Лукашэнка замітусіўся напярэдадні прыезду прадстаўнікоў Еўразвязу...
Замітусіўся са зразумелых прычынаў, бо эканамічная сітуацыя вельмі складаная: становішча краіны пагаршаецца, а ўлада не ведае, як яе палепшыць — планаў рэформаў няма.
Людзі могуць вытрымаць многае падчас рэформаў — толькі трэба папярэдзіць, распавесці пра плян ды пераканаць, што гэта неабходна.
А сам Лукашэнка ведае, што рабіць?
Ён — савецкі чалавек, і напэўна думае, што савецкая эканамічная мадэль не да канца скарыстаная ў Беларусі. Ён памыляецца — безумоўна, рэформы патрэбныя. Пра гэта ведаюць нават бабулькі ў маёй вёсцы. Але яны кажуць пра перамены так: «Толькі асцярожненька трэба».
А ўлады не робяць гэтага, бо разумеюць, што рэсурс даверу (не толькі эканамічнага) вычарпаны, і трэба было іх праводзіць раней. Але ніколі не позна. Іх можна рабіць, іх трэба рабіць, бо іншага шляху няма.
Беларускія ўлады — як кепскі доктар, які дае анальгін пацыенту з апендыцытам і кажа, што будзе лепей. Але аперацыя мае быць.
