Урачыстасць адбылася 4 лютага ў фальварку Мерачоўшчына (Івацэвіцкі раён), дзе цяпер знаходзіцца музей-сядзіба ў гонар кіраўніка вызвольнага паўстання 1794 году за незалежнасць Бацькаўшчыны.
Напачатку ўдзельнікі святочнай імпрэзы ўсклалі кветкі ля валуна з надпісам «Тут ва ўрочышчы Мерачоўшчына нарадзіўся вялікі сын беларускай зямлі, які ў далейшым стаў нацыянальным героем Польшчы, ЗША, ганаровым грамадзянінам Францыі».
Затым госці святочнага мерапрыемства праслухалі музычны канцэрт з удзелам беларускіх і польскіх выканаўцаў. Дырэктар музея Ірына Анціпенка арганізавала цікавую пазнавальную экскурсію па залах музея-сядзібы, дзе шматлікія наведвальнікі мелі магчымасць пазнаёміцца з жыццём і побытам беларускай шляхты другой паловы 18 — першай паловы 19 стагоддзяў.
Як распавёў сябра рады Руху «За Свабоду» Віктар Сырыца, ва ўрачыстасці, прысвечанай Касцюшку, прынялі ўдзел прадстаўнікі Івацэвіцкага райвыканкама, Брэсцкага аблвыканкама, амбасадаў ЗША, Польшчы, Расіі і Швейцарыі.
