Як заявіў PAP польскі еўрадэпутат Яцэк Пратасевіч, канчатковае рашэнне прыме Канферэнцыя кіраўнікоў палітычных груп Еўрапарламента.

Раней Еўрапарламент прапаноўваў, каб Беларусь у «Еўранэсце» прадставілі 5 дэпутатаў Нацыянальнага сходу і 5 апазіцыянераў. Афіцыйны Мінск ад такога варыянту рэзка адмовіўся. Арменія ж, Азербайджан, Грузія, Малдова і Украіна будуць прадстаўленыя 10 дэпутатамі нацыянальных парламентаў.

Пасля прэзідэнцкіх выбараў 19 снежня сітуацыя з удзелам Беларусі ў «Еўранэсце» сталася зусім складанай. Абмяркоўвалася ў якасці санкцыі нават выключэнне нашай краіны з праграмы «Усходняе партнёрства». Пакуль што ў Еўрапарламенце, па ўсім, спынілся на замарозцы ўдзелу.

Лідэр Руху «За Свабоду» Аляксандр Мілінкевіч лічыць вельмі важнай прысутнасць Беларусі ў «Еўранэсце». Мае значэнне і тое, на яго думку, якім будзе пачатак працы Парламенцкай асамблеі праграмы Еўрасаюза «Усходняе партнёрства». Абсалютны няўдзел жа нашай краіны ў першым пасяджэнні — негатыўная сімвалічнасць.

Мілінкевіч кажа, што рашэнне наконт незапрашэння афіцыйных прадстаўнікоў Мінска на старт працы «Еўранэсту» ёсць адэкватным адказам на падзеі 19 снежня. Але прапануе скарэктаваць яго ўдзелам у працы «Еўранэста» прадстаўнікоў грамадзянскай супольнасці з правам дарадчага голасу.

«Гэта падкрэсліць слушную пазіцыю Еўрасаюзу, што праз абструкцыю беларускіх уладаў не павінна пацярпець Беларусь як краіна і беларусы як народ», — сказаў палітык у інтэрв’ю Pyx.by.