Скончыўся набор на чарговы год навучаньня ў польскай навучальнай праграме імя Кастуся Каліноўскага. Сярод іншага, увагу грамадзкасьці выклікаў той факт, што сёлета на праграму паступілі некалькі вядомых людзей, у тым ліку былы кандыдат у прэзыдэнты Андрэй Саньнікаў.
«Андрэй Саннікаў, Вячаслаў Сіўчык, Дар’я Корсак — усе яны пайшлі на праграму пасьлядыплёмнай адукацыі. Гэта можа быць творчая праца на абраную стыпэндыятам тэму. Стыпэндыя ў іх такая ж, як і ў студэнтаў-каліноўцаў, а разьлічаная праграма навучаньня на год», — патлумачыла куратарка праграмы Іна Кулей.
Стыпэндыяльная праграма ўраду Рэспублікі Польшчы імя Кастуся Каліноўскага была створаная пад патранатам прэм’ер-міністра Польшчы ў сакавіку 2006 году. Яна стваралася з мэтай дапамогі студэнтам, выключаным зь беларускіх навучальных установаў дзеля палітычных прычын. Зь цягам часу праграма пашырылася і на тых, хто ня мае магчымасьці навучацца ў Беларусі праз свае палітычныя погляды.
