25 сакавіка ў Воранаве ўшанавалі памяць генерала БНР Кіпрыяна Кандратовіча. Са словаў каардынатара Руху «За Свабоду» па Гродзеншчыне Сяргея Трафімчыка, магілу генерала, якая знаходзіцца недалёка ад праваслаўнай царквы ў Воранаве, актывісты з розных гарадоў Беларусі наведваюць штогод, паведамляе Радыё Свабода.
Сёлета ў Дзень волі ўсе, хто прыбіраў магілу генерала, ускладаў кветкі і запальваў свечкі, разам сфатаграфаваліся з разгорнутым бел-чырвона-белым сцягам.
«Мы кожны год наведваем тыя мясціны, робім добраўпарадкаванне, ушаноўваем герояў, што аддалі сваё жыццё за свабоду Радзімы. Менавіта ў такім самым фармаце, са сцягамі і стужкамі, праводзім ушанаванне, і ніякіх прэтэнзіяў з боку уладаў дагэтуль не узнікала,» — зазначае Сяргей Трафімчык.
На могілках у той час, са словаў каардынатара Руху «За Свабоду», нікога не заўважылі. Але пасля таго як здымак з’явіўся ў інтэрнэце, актывістаў апыталі міліцыянты. Яны ж і сказалі актывістам, што на іх заведзеная адміністрацыйная справа — іх абвінавачваюць у правядзенні несанкцыянаванай акцыі.
