Мясцовыя грамадскія і палітычныя актывісты накіравалі 21 снежня заяву на імя Генеральнага пракурора РБ. У ёй гаворыцца, што згодна з артыкулам 35 Канстытуцыі Рэспублікі Беларусь грамадзяне маюць права на свабоду сходаў, мітынгаў і дэманстрацый. Баранавіцкія актывісты рашуча асуджаюць дзеяньні ўладаў па гвалтоўнаму разгону мірнай дэманстрацыі у Мінску 19 снежня 2010 года. Яны патрабуюць вызваліць з турмаў усіх кандыдатаў у прэзыдэнты Рэспублікі Беларусь: Уладзіміра Някляева, Андрэя Саннікава, Мікалая Статкевіча, Віталя Рымашэўскага, Алеся Міхалевіча і тэрмінова вызваліць іх давераных асабаў і усіх незаконна затрыманых на Плошчы 19 снежня 2010 года.
Грамадскія актывісты таксама настойваюць на справядлівым і аб’ектыўным расследаваньні дзеянняў праваахоўчых органаў, выяўленьні правакатараў, якія збівалі кандыдатаў у прэзыдэнты, удзельнікаў мірнай дэманстрацыі.
Заяву падпісалі:
- Віктар Сырыца, сябра Руху «За Свабоду»;
- Анжэла Камбалава, сябра АГП;
- Вячаслаў Болбат кіраўнік БСДП (Г), кіраўнік мясцовага штаба Уладзіміра Някляева;
- Сяргей Гоўша, праваабаронца;
- Віктар Мязяк, давераная асоба Андрэя Саннікава;
- Алесь Грыцавец, сябра Партыі БНФ.
