Жыхары Баранавічаў традыцыйна ў гэты час ладзяць талаку па добраўпарадкаванню тэрыторыі ля Крыжа сталінскіх ахвяраў1939-1953 гг, ў сквэры на скрыжаванні вуліц Смаленскай і Пірагова.
На гэтым месцы была турма «Крывое кола», у якой былі закатаваныя тысячы нявінных людзей. Таму тутака ў 1992 годзе і быў усталяваны Крыж — знак памяці пра ахвяраў бальшавіцкіх рэпрэсій.
Баранавіцкія актывісты Руху «За Свабоду» і іншыя прадстаўнікі недзяржаўных партый і арганізацый ўзялі на сябе абавязак даглядаць гэта кавалак зямлі. Ля крыжа ўзаралі зямлю ды пасеялі кветкі, а наўкол прыбралі старое лісце і смецце.
Актывіст «Руха «За свабоду» Віктар Сырыца адзначыў, што падчас мерапрыемства мінакам раздавалі інфармацыю пра ахвяраў сталінскіх рэпрэсій і апавядалі пра растрэлы людзей у турме «Крывое кола». Пасля заканчэння акцыі грамадскія актывісты запалілі зьнічы і праспявалі «Магутны Божа».
