«Беларускі выбар» накіраваны на яднанне беларускіх грамадска-палітычных арганізацыяў, якія падзяляюць каштоўнасці незалежнасці, дэмакратыі і еўрапейскага выбару Беларусі.

«Мы дамаўляемся аб супрацоўніцтве падчас кампаніі прэзідэнцкіх выбараў, каардынацыі пры вылучэнні сваіх прадстаўнікоў у выбарчыя камісіі і назіранні, імкнемся да правядзення супольнай палітычнай кампаніі ў часе выбараў», — гаворыцца ў пагадненні.

Арганізацыі, якія ўвайшлі у «Беларускі выбар» падзяляюць 12 асноўных прынцыпаў рэфармавання краіны:

• Правядзенне канстытуцыйнай рэформы, а менавіта падзел уладаў, дэмакратычныя выбары, незалежная судовая сістэма, мясцовае самакіраванне;
• Правядзенне адказнай сацыяльнай палітыкі ў інтарэсах насельніцтва;
• Пабудова рынкавай сацыяльна арыентаванай эканомікі;
• Павага дэмакратычных свабодаў і правоў чалавека;
• Гарантаванне незалежнасці сродкаў масавай інфармацыі;
• Абарона навакольнага асяроддзя і развіццё альтэрнатыўных крыніцаў энергіі;
• Падтрымка малога і сярэдняга бізнэсу;
• Адмена прымусовай кантрактнай сістэмы;
• Захаванне і развіццё беларускай нацыянальнай культуры і мовы;
• Клопат пра здароўе нацыі, старэйшае пакаленне і найменш абароненыя катэгорыі грамадзянаў;
• Павелічэнне якасці адукацыі і развіццё «грамадства ведаў»;
• Увядзенне еўрапейскіх стандартаў ва ўсіх сферах жыццядзейнасці і паслядоўная інтэграцыя Беларусі ў ЕС, пры захаванні добрасуседскіх адносінаў з Украінай і Расіяй.

Прадстаўляць Грамадзянскую Акцыю «Беларускі выбар» ўпаўнаважваецца Старшыня Руху «За Свабоду» Аляксандр Мілінкевіч.

Лідэр Руху «За Свабоду» таксама паведаміў, што, ў сувязі нежаданнем уладаў зрабіць рэальныя крокі па дэмакратызацыі выбарчага працэсу, а таксама раз’яднанасцю апазіцыі, адмаўляецца ад удзелу ў прэзідэнцкіх выбарах у якасці кандыдата. У той жа час, Аляксандр Мілінкевіч намераны актыўна ўдзельнічаць у палітычнай кампаніі, каб узмацніць прабеларускія сілы, якія спатрэбяцца на сапраўдных дэмакратычных выбарах.