Актывісты Руху дапамаглі жыхарам дому № 78 па вул. Рафіева арганізаваць збор подпісаў пад зваротам у адміністрацыю Маскоўскага раёна Мінска з просьбай палепшыць умовы пражывання ў пад’ездах, якія месцяцца побач з адзіным для дамоў № 80, 82, 84, 86 скразным праездам. Апошнія гады, з прычыны росту аўтамабілізацыі ў горадзе, праезд перагружаны, па ім пастаянна рухаецца транспарт.
Жыхары (пад зваротам у адміністрацыю раёна ужо падпісаліся сорак чалавек) прапануюць у пад’ездах, што месцяцца побач з праездам, усталяваць сучасныя, з добрай гукаізаляцыяй, шклопакеты, а таксама пабудаваць дадатковы праезд у двары згаданых чатырох дамоў.
Спецыялісты ад Руху «За Свабоду» пацвердзілі, што магчымасці для стварэння дадатковага праезду сапраўды ёсць. Яны распрацавалі план рэканструкцыі дваровай тэрыторыі, які прадугледжвае пабудову дадатковага праезду з мінімальнымі выдаткамі. Гэты план разам з заявай грамадзян ужо перададзены ў адміністрацыю Маскоўскага раёну.
